Text: Davide Van De Sfroos. Brèva E Tivàn. Pulenta E Galena Fregia.

Pulenta e galena fregia
e un fantasma in soe la veranda
barbera cume' petroli
e anca la loena me paar che sbanda...
cadrega che fa frecass
e buca verta che diis nagott
duma la radio sgraffigna l'aria
e i pensee fann un gran casott....

L'e mea vera che nel silenzio
dorma duma la malincunia
l'e mea vera che un tuscanell
l'e mea bon de fa una puesia
in questa stanza senza urelogg
bala la fata e bala la stria
in questu siit senza la luus
che diis tucoos l'e duma' l'umbria....

E sculta el veent che pica la porta
cun in crapa una nigula e in brasc una sporta
el diis che g'ha deent un el regaal
me sa che l'e el solito tempuraal....
E sculta i spiriti e sculta i fulett
che ranpeghen soel muur e solten foe di cassett
g'hann soe i vestii de quand seri penenn
i ne vann e i ne vegnen cun't el buceer del venn...

E la candela la sta mai ferma
e la se moev cume la memoria
anca el ragn soe la balaustra
ricama el quadru de la sua storia
la ragnatela di me pensee
la ciapa tutt quell che ruva scia
ma tanti voolt la g'ha troppi bocc
e l'e tuta de rammenda....

La finestra la sbatt i all,
ma la sa che po' mea na' via
e i stell g'hann la facia lustra
cume i occ de la nustalgia
in questa stanza senza nissoen,
vardi luntan e se vedi in facia
in questa stanza de un oltru teemp,
i me fantasmi i lassen la traccia.....